Nga BUJAR QESJA, Mjeshtër i Madh

Në galeritë e qytetit të lashtë të Durrësit, më 27 gusht 2025, u hap një ngjarje e cila tashmë ka fituar zemrat e publikut: ekspozita personale e piktores së mirënjohur Shpresa Milaqi Bajko, e titulluar thjesht dhe kuptimplotë “Verë”.

Është titull që bart në vetvete nxehtësinë e stinës, dritën e pafundme të ditëve të gjata, por edhe pasionin e pashtershëm të një krijueseje që i ka dhënë jetën pikturës dhe që pikturën e ka bërë jetë.

Ekspozita përmbledh 99 punime të realizuara në vaj, akuarel dhe grafikë. Është pasuri krijuese, e cila shpaloset para syve të vizitorëve si shëtitje e gjallë ndër rrugicat e Durrësit, ndër valët e kaltërta të detit, në fytyrat dhe portretet e njerëzve të thjeshtë, në qetësinë e natyrës dhe në lirizmin e temave të hapura ku njeriu dhe ambienti ndërthuren natyrshëm. Ky univers pikturor nuk është vetëm një ekspozitë, por rrëfim i gjatë, një ditar shpirtëror i jetës dhe dashurisë për artin.

Piktore e ngulmët dhe e dashuruar me artin

Shpresa Milaqi Bajko është krijuese, e cila nuk i njeh kufijtë e lodhjes. Punon shumë, përkushtohet pa kursim dhe mbi të gjitha, e ndjen pikturën si frymën e saj të parë. Nuk është emër që vjen nga fjalët e mëdha të krahasimeve me mjeshtrit botërorë. Nuk ka nevojë të quhet “Picasso”, sepse është Shpresa Milaqi Bajko, e pakrahasueshme në thjeshtësinë dhe sinqeritetin e saj.

Në harkun e karrierës ka realizuar tashmë 12 ekspozita personale, ndërkohë që veprat e saj kanë qenë pjesë edhe e Galerisë Kombëtare të Arteve në Tiranë dhe të shumë ekspozitave ndërkombëtare.

Ky itinerar i ngjeshur dëshmon jo vetëm për produktivitetin, por mbi të gjitha për vullnetin artistik të një gruaje që e sheh jetën përmes penelit.

Në të gjitha pikturat e saj, qoftë në vajin e thellë, në delikatesën e akuarelit apo në ngurtësinë elegante të grafikës, përpiqet të japë ajër dhe dritë, të rikrijojë univers të pasur me ngjyra dhe emocione. Drita, si element përbashkues i gjithë krijimtarisë, është shenja dalluese, që i jep jetë çdo forme, çdo portreti, çdo peizazhi.

Tematika që lidhen me njeriun dhe vendlindjen

Temat që piktorja zgjedh nuk janë të rastësishme. Ato burojnë nga kujtesa, nga realiteti që e rrethon, nga dashuria për vendlindjen dhe njerëzit e saj.

Rrugicat e Durrësit, jo thjesht rrugë, por labirithe kujtimesh, ku çdo hapësirë mbart aromën e historisë dhe të jetës së përditshme. Në to gërshetohet e shkuara me të tashmen, ndoshta edhe e ardhmja.

Natyra e qetë: tavolina modeste me fruta, vazo me lule, sende të thjeshta të jetës së përditshme, që në penelin e Shpresës marrin dimension poetik.

Njeriu dhe deti: një binom i pandashëm. Fytyra që shohin larg, trupat që përplasen me valët, qetësia dhe improzimet, të gjitha flasin për jetën që deti e jep dhe e merr.

Portretet: njerëz të thjeshtë, miq, familjarë, qytetarë të Durrësit që shfaqen në piktura me një realizëm të përzier me butësinë.

Tema të lira: aty ku imagjinata kapërcen kufijtë dhe i lë hapësirë interpretimit, gjithmonë duke vendosur njeriun në qendër.

Pikturat e saj nuk janë thjesht pamje, por gjendje shpirtërore. Teksa vizitorët ecin mes punimeve, ndjejnë se përballë kanë një rrëfimtar të heshtur që flet me ngjyra dhe jo me fjalë.

Ekspozita “Verë” si ngjarje kulturore

Që në ditët e para, ekspozita ka ngjallur interes të madh. Vizitorë të shumtë, jo vetëm qytetarë të Durrësit, por edhe turistë të huaj, kanë hyrë në galeri për të soditur këto krijime. Disa prej tyre kanë nisur edhe porositë e para, duke dëshiruar t’i bëjnë pjesë të pasurisë së tyre shpirtërore e materiale.

Në këtë mënyrë, “Verë” nuk është vetëm një ekspozitë, por ngjarje e rëndësishme në jetën kulturore të Durrësit. Qyteti bregdetar, me lashtësinë dhe kulturën e vet të shumëfishtë, i shton mozaikut të tij edhe tjetër gur të çmuar: krijimtarinë e Shpresa Milaqi Bajko, e cila me artin e saj i dhuron Durrësit një pasqyrë të shpirtit të vet.

Profili i piktores: thjeshtësi dhe dashuri njerëzore

Përtej penelit, Shpresa është një grua që durrsakët e njohin dhe e duan. E thjeshtë, e komunikueshme, e dashur, cilësi që reflektohen edhe në artin e saj. Ajo flet qetë, dëgjon me kujdes, reagon ëmbël. Ky karakter i ndritshëm është një nga arsyet pse krijimtaria e saj nuk është e largët, por afër njerëzve, pjesë e jetës së përditshme të publikut.

Rol të rëndësishëm në rrugëtimin e saj artistik e ka luajtur edhe bashkëshorti, Petrit Bajko, i cili e ka inkurajuar dhe mbështetur në çdo hap. Kjo harmoni familjare është një forcë e shtuar për piktoren, një mbështetje e domosdoshme për rrugë të gjatë që kërkon energji dhe shpirt.

Një sukses i merituar

“Verë” është më shumë se ekspozitë. Është sukses i plotë,stacion i rëndësishëm në rrugëtimin e saj artistik. Çdo vepër është copëz jete, fije ndjenje, reflektim mbi botën dhe njerëzit. Në to gjendet dritë, frymë, liri dhe pasion, gjëra që e bëjnë pikturën e Shpresës të gjallë e të prekshme.

Në fund, vizitori largohet me ndjenjë të veçantë: sikur ka biseduar me një mikeshë të afërt, që i ka treguar histori pa fjalë, vetëm me ngjyra. Dhe kjo është fuqia e artit të saj. Bajko bën atë që di dhe si e di, me ndershmëri dhe dashuri.

Në këtë mënyrë, ekspozita “Verë” nuk është vetëm një ngjarje kalimtare, por një kujtim i ngulitur në mendjen e publikut, një dëshmi se arti i Shpresa Milaqi Bajko është pasuri e qytetit dhe e kulturës shqiptare.

Piktura është jeta e Shpresës. Dhe përmes saj, ajo na dhuron një jetë të dytë, të mbushur me ngjyra, dritë dhe dashuri.