Ditët e fundit, doli në qarkullim në Tiranë përmbledhja e re publicistike “Të shpëtohet afresku i Shpatarakut” e studiuesit të fotografisë, publicistit dhe fotografit Qerim Vrioni.

Në të paraqiten shkrime të autorit të botuara gjatë njëzet viteve të fundit në shtypin shqip brenda dhe jashtë vendit.

Ky botim ndahet në pesë pjesë. Kreu i parë titullohet “Çështje shoqërore”, ku përfshihet edhe shkrimi që i ka dhënë titullin librit. Në këtë shkrim bëhet fjalë për gjëndjen e tanishme jo të mirë të afreskut “Apokalipsi” të Kostandin Shpatarakut në Kishën e “Shën Marenës” në Llëngë të Pogradecit. Piktura murore ose afresku me përmasa 130 cm x 240 cm, ndodhet në një faqe muri brenda kishës së vogël, e krijuar nga Shpataraku në vitin 1754, rreth 270 vite më herët. Me shumë gjasa. kjo vepër mund të jetë edhe më e vjetra e llojit në trojet shqiptare.

Kreu i dytë përmban “Shënime për libra dhe ekspozita fotografie”, të botuara së pari posaçërisht për raste të caktuara. “Figura të shquara”, emërtohet kreu i tretë, ku shkruhet për personalitete të tilla të njohura në kulturën kombëtare si Ramadan Sokoli (muzikë), Piro Naçe (fotografi), Vangjush Mio (pikturë), Sadri Ahmeti (poezi dhe pikturë), Pano Taçi (poezi), Bajram Sefaj (letërsi dhe publicistikë), Fatos Baxhaku (publicistikë), Luan Mulliqi (skulpturë) etj., dhe të dalluar për kontributet e tyre në fusha të ndryshme

Kreu i katërt titullohet “Nga Fotografia Botërore”. Brenda tij trajtohen pjesë nga krijimtaria më e spikatur e fotografëve të njohur Jousuf Karsh (kanadez), Arnold Newman (amerikan), Ara Guler (turk) dhe Hyppolyte Bayard (francez), të cilët futen edhe në ajkën e historisë botërore të fotografisë.

Në pjesën e fundit, janë paraqituar dy intervista të autorit rreth veprimtarisë së tij krijuese në vite. E para e transmetuar drejtëpërdrejtë në seksionin shqip të radios britanike BBC me gazetarin Ilir Kadia, më 9 qershor 2009, ndërsa e dyta me publicistin nga Prishtina Bajram Sefaj, është botuar në faqet e gazetës kulturore “ExLibris”, më 27 gusht 2022.