Kryeministri Edi Rama ftoi qytetarët të bëhen pjesë e aktiviteteve që janë në axhendën e Javëve Kulturore Ndërkombëtare, të cilat për 7 ditë rresht do t’i dedikohen kulturës britanike.
“Shqipëria mikpret botën. Bëhuni pjesë e Javës së Kulturës së Mbretërisë së Bashkuar deri më 10 shtator, ku Shqipëria mikpret mes shumë aktivitetesh vendin e një kulture të madhe”, shkroi Kryeministri Rama në rrjetet sociale.
Javës së Kulturës së Mbretërisë së Bashkuar i parapriu Java e Kulturës së Azerbajxhanit, ku ndër të tjera ra në sy performanca e Orkestrës Shtetërore të Dhomës së Azerbajxhanit, “Gara Garayev”.
Javët Kulturore Ndërkombëtare” janë konceptuar si një mozaik aktivitetesh kulturore, ku çdo javë do t’i dedikohet një shteti. Pas një shkëputje gjatë sezonit veror, tashmë ky aktivitet nis sërish dhe në fokus të tij është promovimi i vlerave dhe shkëmbimi i eksperiencave.
Mbi 700 artistë janë pjesë e programit e këtij viti, ku ndër ta do të jenë dhe emra të njohur të arenës ndërkombëtare.
Edicioni i dytë i këtij viti përfundon më 30 nëntor 2023.
