Qendra Kombëtare e Librit dhe Leximit nisi në Liceun Artistik “Jordan Misja”, ciklin “Biblioteka e artit”, e cila bën bashkë fjalën dhe imazhin duke iu kushtuar figurave shenjuese të historisë së artit pamor shqiptar.

Ky cikël do të vijojë përgjatë gjithë vitit shkollor me takime mujore. E pranishme në këtë seancë të parë ishte drejtoresha e QKLL-së, Arta Marku dhe drejtoresha e Liceut Artistik, Etleva Kolnikaj të cilat, shpjeguan se takimet e vitit në vijim do të kenë lidhje të drejtpërdrejtë me 80-vjetorin e Liceut duke u fokusuar te monografitë që u kushtohen emrave që kanë lënë gjurmë në historinë e kësaj shkolle.

Kjo është arsyeja përse “Biblioteka e artit” u hap me diskutimin mbi monografinë e Nexhmedin Zajmit, pedagog qysh në hapat e parë të Liceut, një ndër emrat më të rëndësishëm të pikturës shqiptare të viteve ’40-’90 të shekullit të shkuar.
Figurën e Zajmit e paraqiti para liceistëve, studiuesi dhe historiani i artit, Oltsen Gripshi.

Ai u ndal te veprat kyç të karrierës së artistit i cili lëvroi me të njëjtën fuqi shprehëse të gjitha zhanret e artit pamor: portretin, kompozimet shumëfigurëshe, peizazhet, brenditë dhe natyrat e qeta. Gripshi përmendi influencën e jashtëzakonshme të Zajmit te bashkëkohësit, te kolegët e tij të së njëjtës periudhë por dhe te të gjithë brezat që janë gjendur në një dialog virtual me veprat e tij.
“Biblioteka e artit” do të jetë e përmuajshme, duke tërhequr çdo herë vëmendjen e të rinjve mbi një tjetër figurë përfaqësuese të artit pamor shqiptar.