Ekspozita “Impresione Urbane” ka hapur dyert në Galerinë e Artit Pamor “Nikolet Vasia” në Durrës, duke sjellë për artdashësit një përvojë të veçantë artistike.

Katër arkitektë të njohur dhe mjaft të vlerësuar në fushën e tyre, Maksim Mitrojorgji, Valentin Voshtina, Pirro Stefa dhe Olsi Plasa, vijnë kësaj here para publikut me një tjetër dimension të krijimtarisë së tyre: pikturën.

Në këtë ekspozitë kolektive prezantohen rreth 100 punime, kryesisht peizazhe urbane, që pasqyrojnë qytete shqiptare përmes një këndvështrimi artistik, ku arkitektura, drita dhe ngjyra ndërthuren në harmoni.

“Impresione Urbane” është një ftesë për të parë qytetin ndryshe, për të reflektuar mbi identitetin urban dhe për të shijuar artin si një gjuhë universale që lidh profesionin me pasionin.