“Yellow Spots in the Black Box”

Ekspozita e artistit që jeton dhe vepron në New York, Alkan Nallbani, e hapur në “Open Art Gallery”, në Prishtinë

Nga Ardian Isufi – Elton Koritari

“Yellow Spots in the Black Box” frymëzohet nga një tension poetik: njolla drite që shfaqen brenda një hapësire të errët, të mbyllur, e të pakapshme. Alkan Nallbani përdor stigmat piktorike si shenja të jetës, kujtesës, energjisë dhe zbulimit, ndërsa kutinë e zezë si objekt metaforik “pinhol-i” që shfaqet si subjekt në brendësinë e njeriut, për realitetet e fshehura, për universet që ekzistojnë përtej shikimit të menjëhershëm.

Kjo ekspozitë e konceptuar për “2-vjetorin e Open Art Gallery” vendos theksin mbi procesin e kërkimit të dritës në shtresat e errëta të perceptimit dhe përvojës kohore.
Hapësira të integron në laborator perjetimi, një ambient ku vizitori futet “brenda dhomës së errët”, duke ndjerë në pështjellime intense dritat e pjesshme dhe ndriçimet e papritura që vezullojnë energjinë e brendëshme të artistit. Pra, është një eksplorim i momenteve të vogla inkandeshente piktorike që mbijetojnë brenda thellësive të padukshme.

Artisti në këtë rast është “vuajarist” i personazheve të tij!,,, ata janë eksploratorë, ëndërrtarë, gjallesa mitike, ndoshta pjestar është edhe ndonjë personazh prej publikut që udhëton drejt momenteve të vogla të zbulesës duke e shëndrruar errësirën në terren të gjallë reflektimi shëndritës. Ashtu si Albert Camus thotë:

“Mos ec para meje… Unë nuk mund të ndjek.
Mos ec pas meje,,, Unë mund mos të udhëheq.
Ec pranë meje… thjesht bëhu shoku im.”

Kjo ekspozitë është një vend arkivimi i pezullnajës të qënies njerzore, si territor i mbyllur ku ruhen gabimet, të vërtetat e pakapshme, ritmet e brendshme të jetës, si në avionët që i mbijetojnë çdo katastrofe ose si laboratorët ku realiteti analizohet si kërkim zhvillues.