50 artistë nga Kosova ekspozuan në galerinë FAB të Universitetit të Arteve në Tiranë,punime në pikturë, skulpturë, etj.

Ekspozita shëtitëse vjen e kuruar dhe organizuar nga Kamuran Goranci dhe sjell për publikun, një tjetër manifestim të vlerave artistike të artit shqiptar të Kosovës, me emra të tillë si Agron Mulliqi, Barha Buza, Diella Vala, Burimi Myftiu, Drilon Shoshi, Haxhi Kastrati, Naim Spahiu, Valbona Gashi, etj.

Ekspozita shëtitëse e Asociacionit të Artistëve Vizual të Kosovës (AAVK) që është një prezantim i gjerë dhe i shumëllojshëm i artit vizual bashkëkohor të Kosovës, ku takohen gjenerata të ndryshme krijuesish në një dialog të pasur artistik u çel me prezencën e Ambasadorit të Republikës së Kosovës z. Skënder Durmishi.

Të pranishëm ishin edhe rektori i Universitetit të Arteve, Prof. Dr. Erald Bakalli, sekretari i përgjithshëm të Ministrisë së Kulturës, Bislim Bislimi, artistëve të ndryshëm dhe pedagogë të arteve.

Në tekstin kuratorial rreth ekspozitës thuhet se ky projekt sjell në një hapësirë të vetme përvoja të ndryshme krijimtarie.

“Kjo ekspozitë shëtitëse me mbi 50 artistë nga Kosova, e kuruar dhe organizuar nga Kamuran Goranci sjell për publikun vendas, një tjetër manifestim të vlerave artistike të një Kombi.
Si e tillë, ajo përforcon edhe më shumë ato ura e bashkëpunimit mes institucioneve, sa dhe artistëve shqiptar kudo që ndodhen”, shkruan Dr. Ermir Hoxha, drejtuesi i Galerisë FAB.