Revista prestigjoze sllovene “Auto motor classic”, në botimin e saj të radhës, i ka dedikuar hapësirë të veçantë koleksionit shqiptar Retro.al për organizimin e simpoziumit të parë në Shqipëri në bashkëpunim me FIVA, ku u mblodhën përfaqësues nga klube të mjeteve historike nga e gjithë bota, si dhe u ekspozuan mbi 80 mjete të koleksionit shqiptar Retro në Sheshin “Skënderbej”.
“Përmes një shkrimi të shkurtër mbi suksesin e aktivitetit në kryeqytetin shqiptar, simpoziumit me temë “Partneriteti dhe bashkëpunimi me qeverinë dhe institucionet e tjera” dhe disa përshkrimeve mbi vlerat që RETRO Albania mbart dhe përfaqëson për trashëgiminë kulturore të Shqipërisë dhe automotorizimin shqiptar, jemi të sigurt që jehona e saj do të përhapet edhe më shumë duke kaluar çdo kufi”, bën të ditur Drejtoria e Përgjithshme e Shërbimit të Transportit Rrugor.
Sipas DPSHTRR-së, Shqipëria tanimë, njëjtë ose edhe më mirë se shumë vende të zhvilluara të rajonit, është pjesë e trashëgimisë kulturore ndërkombëtare për sa i përket sektorit automotiv.
