Nga Alkan Nallbani
Piktor, kurator i ekspozitës

Ekspozita personale “Wanderlust” bashkon temat qendrore të pikturës së Bashkim Ahmeti Izanos: mitin dhe rrëfimin, peisazhet rurale, pamjet urbane, figurat njerëzore dhe kujtimet që barten nga një vend në tjetrin.

Së bashku, këto vepra krijojnë një udhëtim të vazhdueshëm mes Shqipërisë dhe Amerikës, kujtesës dhe imagjinatës, historisë se ralle dhe së tashmes magjepse.

Marrëdhënia e Bashkim (A) Izanos me Shqipërinë—me legjendat, peisazhet, figurat historike dhe kujtesën kolektive të saj—është themelore për praktikën e tij artistike. Megjithatë, ai nuk i ilustron thjesht këto histori; ai i transformon ato.

Miti bëhet një hapësirë për krijim dhe gjetje, ku imazhet e njohura lëvizin mes ëndrrës dhe realitetit dhe marrin një karakter thellësisht personal, me një cilësi magjike.

Edhe peizazhete tij ekzistojnë mes vëzhgimit dhe imagjinatës. Malet, retë dhe terreni i ashper shndërrohen në hapësira psikologjike—të bukura, të paqëndrueshme dhe të ngarkuara me mundësinë e ndryshimit.
Në pikturat e tij të Nju-Jorkut, peisazhi urban bëhet një tjetër fushë eksplorimi, ku arkitektura, natyra, kujtesa dhe moderniteti përplasen dhe ndërthuren.

Figurat, nudot, vizatimet dhe skicat përgatitore zbulojnë një anë më intime të praktikës së artistit, një ditar të vazhdueshëm te informacionit vizual dhe një dëshmi të procesit të eksperimentimit.

Si rrjedhim, ekspozita e fton shikuesin jo thjesht të sodisi pikturat e përfunduara, por të hyjë në botën e kërkimit dhe zbulimit të artistit.

Në thelb, Wanderlust është një meditim mbi lëvizjen. Udhëtimi i Izanos—nga Gjirokastra në Nju-Jork, nga historitë e trashëguara drejt gjetjes personale dhe nga tradita drejt bashkëkohores—zbulon një artist që vazhdon të kërkojë, të vërë në dyshim dhe të zbuloje. Vetë udhëtimi bëhet subjekti.