Nga Prof. Gazmend Leka

Miq në FB,

Po ju drejtohem sot, jo thjesht me një ftesë, por me një thirrje të fortë, ndoshta më të fortën që kam bërë prej kohësh.

Miq që ju kam njohur ndër vite, që nga atelietë e shkollës, nga diskutimet për artin, e deri te ekspozitat ku kemi ndarë emocionin, pasionin dhe zhgënjimin. Kjo ftesë është për ju.

Këtë të shtunë, në rrugën “Myslym Shyri”, ndodh diçka që nuk duhet ta kalojmë si një ngjarje të zakonshme.

Po, hapet një ekspozitë me katër autorë. Por kjo nuk është ngjarja kryesore.

Ngjarja e vërtetë është se për herë të parë në atë rrugë mbillet berthama e një galerie arti.

Një hapësirë që për vite me radhë ka qenë një studio pikture dhe arkitekture, një vend pune, një vend ëndrrash për familjen Myftari, sot merr një rol shumë më të madh: dëshira të bëhet një qendër e gjallë për komunikim, takim dhe ekspozim i vlerave tona artistike.

Dhe kjo ndodh në një kohë të vështirë.

Në një kohë kur galeritë me emër janë mbyllur njëra pas tjetrës, kur hapësirat për art janë tkurrur, kur energjia e artistëve nuk gjen vend ku të shpërthejë e kur veprat mbeten të mbyllura në studio, në heshtje.

Pikërisht në këtë realitet, dikush vendos të bëjë të kundërtën.

Nasuf Myftari, një njeri që nuk u mjaftua me zhvendosjen nga Elbasani në Tiranë për të ndërtuar jetën e familjes së tij me djem artistë.

Ai vendosi të ndërtojë diçka më shumë, një mundësi për të gjithë.

Prej vitesh e ushqen këtë ide, e mban gjallë, e zhvillon. Dhe këtë të shtunë, ai kërkon t’i japë një dimension të ri, ta shpallë dëshirën e tij.

Por le ta themi qartë: Një galeri nuk bëhet vetëm me mure. As vetëm me drita. As vetëm me dëshirë. Ajo bëhet me artistë. Me praninë tuaj. Me zërin tuaj. Me veprat tuaja. Me mbështetjen tuaj. Nëse ne nuk jemi aty, ajo mbetet një hapësirë familjare. Nëse ne nuk e mbushim, ajo shuhet.

Nëse ne nuk e mbrojmë, ajo humbet si shumë të tjera galeri. Prandaj kjo nuk është thjesht një ftesë për të ardhur e për të parë. Është një thirrje për të marrë përgjegjësi.

Ejani!!!

Shiheni atë ambient të vogël në përmasa, por me një potencial të madh, me finesë, me shpirt.

Bisedoni me Nasufin. Kuptoni çfarë qëndron pas kësaj nisme. Dhe pastaj… Mos u largoni thjesht si vizitorë.

Qëndroni si bashkëpunëtorë. Si kontribues. Si pjesë e kësaj përpjekjeje. Mos i lini veprat tuaja të pluhurosen në qoshet e studiove. Mos i lini idetë të mbeten të mbyllura.

Kjo hapësirë është krijuar. Tani është radha jonë ta mbushim me jetë. Konsiderojeni këtë si një fat që ju ka ardhur pranë. Dhe fati kur vjen, nuk lihet te ikë.

Mbahet. Rritet. Forcohet.

Zgjerojeni këtë nismë. Zbukurojeni me praninë dhe veprat tuaja. Jepini zë. Jepini energji. Jepini vazhdimësi.

Dhe mbi të gjitha, bëjeni thirrjen të dëgjohet:

Le t’i japim një shans kësaj galerie të re arti. Le të mos e humbasim këtë mundësi. Le të tregojmë që arti ynë jo vetëm ekziston, por kërkon hapësirë.

Ju presim të shtunën. Mos mungoni.