Nga Aleksandër Çipa

“Valixhja në mes të pragut”, mes dy kanatave të portës, sa brenda dhe jashtë”, një metaforë e gjetur e dilemës të rrish apo të shkosh…

E ka sjellë në ekspozitën e vet “Rrënjët”-9, Mjeshtri Agim Sulaj.

Deri tani ka fituar 300 çmime ndërkombëtare dhe ka rreth 40 ekspozita personale nëpër galeritë më të përmendura kombëtare dhe globale.

Ekspozita “Rrënjët”-9 është rikthimi vjetor në La Plaza, në Tiranë, si akt besnikërie ndaj mosmungimit në kalendarin artistik të vetes dhe artit shqiptar, në atdhe.

… Vjen me pikturën si hiperrealisti shqiptar, sikundër e cilëson kolegu i vet Agim Janina.

Pikturat e Mjeshtrit Sulaj janë komunikuese të mesazheve sociale dhe njerëzore.

Ekspozita e sivjetme në Tiranë është rishtazi një zgjedhje elitare me portrete dhe imazhe realiste e figurative, mes të cilave janë edhe dy tablo të “Valixhja e emigrantit’ — simbol i dhimbjes dhe shpresës, i dilemës dhe bagazhit të akteve ikanake të qytetarit të sotëm të botës.

Artisti autentik vlonjat ka krijuar tashmë jo vetëm guidën e papërqasshme me artistë të tjerë të rajonit tonë, por përsëritshëm me talent të shtuar, sjell piktura dhe figura vizuale, karaktere në vepra me peshë dhe mesazh imponues.

Peneli i Mjeshtrit Sulaj sjell në çdo edicion të “ Rrënjët” reflektim dhe pasurim stilistik.

Besnik i surrealizmit dhe hiperrealizmit, si preçizionist dhe mjeshtër i satirës sociale në krijime. E shton vit për vit hartën e qëndrimeve të veta ekspozuese në botë duke qenë stoik i mbartjes së identitetit dhe mesazhit shqiptar.