Në kuadër të 10-vjetorit të fondacionit “Art House” në Shkodër u çel ekspozita “Homeward”, që sjell 33 artistë në pesë hapësira të qytetit duke eksploruar tematika të kujtesës, identitetit dhe ripërtëritjes.

Ekspozita nderon figurën e Ferdinand Pacit, me vizatime të prezantuara 50 vite pas ndarjes së tij nga jeta dhe bashkon artistët që kanë qenë pjesë e rezidencës Art House School, në një rikthim simbolik “në shtëpi”.

Ministri i Ekonomisë, Kulturës dhe Inovacionit, Blendi Gonxhja ndau sot momente nga çelja e kësaj ekspozite, që sipas tij ishte e shoqëruar me një program të pasur ngjarjesh, takimesh dhe reflektimesh, që i japin jetë hapësirave dhe dialogut kulturor.

Ekspozita do të qëndrojë e hapur deri më 13 tetor 2025 në: Radio Shkodra, Auditori Françeskan, Art House – Shtëpia e Vjetër e Familjes Paci, Muzeu Kombëtar i Fotografisë Marubi dhe Galeria e Arteve të Shkodrës.

Ekspozita synon të mbështesë artistët e rinj dhe të promovojë praktika të reja në fushën e fotografisë dhe artit pamor, duke e hapur institucionin ndaj qasjeve bashkëkohore dhe ndaj krijuesve që po ndërtojnë identitetin e tyre artistik.

Përmes “Homeward” përcillet mesazhi se arti zhvillohet përmes bashkëpunimit, ndërveprimit dhe mbështetjes së ndërsjellë, duke krijuar ura mes artistëve në Shqipëri, Kosovë dhe më gjerë në Ballkan.

Projekti i ekspozitës u realizua nga Fondacioni “Art House” dhe u mbështet nga Ministria e Ekonomisë, Kulturës dhe Inovacionit, Delegacioni i Bashkimit Evropian në Shqipëri, Javët Kulturore Ndërkombëtare, Ambasada Gjermane, Instituti Italian i Kulturës, etj.

Burimi ATSH