Ekspozita imersive “Rilindja Italiane”, pranë Galerisë së Arteve Digjitale në qytetin e Korçës, u cilësua si një event unik. Ekspozita është një ftesë për të gjithë për të imagjinuar! Përmban vepra nga artistë si: Antonello da Messina , Filippino Lippi, Michelangelo Buonarroti, Leonardi da Vinçi, Sandro Botticelli, Tiziano Vecellio. Ekspozita është e kuruar nga Elton Koritari, i njohur tashmë në aktivitetin e tij si kurator në ekspozita të ndryshme. Ekspozita imersive “Rilindja Italiane” u çel në ditët e dhjetorit që lamë pas, por po vijon në Galerinë e Arteve Digjitale në Korçë. GADK është galeria ku ndërthuret kultura dhe teknologjia së bashku. Ekspozimi në këtë model unik i disa prej veprave të “Rilindjes Italiane”, merr një vlerë të shtuar për artin dhe artistët.

Rilindja italiane filloi në Itali në fund të shekullit të katërmbëdhjetë dhe u bë një epokë e shumë arritjeve kulturore dhe arkitekturore në Evropë. Në tekstin rreth “Rilindjes Italiane” thuhet se kjo ekspozitë ka një rëndësi të veçantë, duke shtuar edhe faktin se ajo afron një publik të gjerë dhe sidomos në moshë të re në ambientet e brishta të artit shqiptar. “Në rastin e Galerisë së Artit Digjital, kjo mishëron vlerat më sublime të Rilindjes – ashtu siç sot janë artet digjitale ashtu edhe Rilindja eksperimentoi me mediume, teknika, materiale dhe solli risi të reja për kohën. Rilindja italiane ishte pjesa më e avancuar e teknologjisë së momentit në botë. Me këtë simbolikë është konceptuar prej fillimit të herës ekspozita në këtë hapësirë alternative të artit. E më tej, gjuha e përdorur nga ekspozita, pra video dhe animacioni, janë larg kufijve të moralit gjykues bazuar në periudhën historike të cilës i referohen veprat e përzgjedhura dhe ndoshta kjo gjë e bën akoma edhe më interesante ekspozitën”, thuhet rreth ekspozitës.