Universiteti i Arteve të Bukura, nën kujdesin e dekanit Prof. Sadik Spahia dhe të kurimit të piktorit Helidon Haliti, çeli edicionin e tretë të ekspozitës “RINart”, punimet e të cilit u ekspozuan në Galerinë “2 Botë”, në Sefaran të Belshit.

Ekspozita përfshin mbi 400 punime të studentëve aktualë të cikleve Bachelor dhe Master, si dhe të atyre që kanë përfunduar studimet ndër vite, të cilët prezantojnë diplomat e tyre.

Në ceremoninë e hapjes mori pjesë edhe kryebashkiaku i Belshit, Arif Tafani.

“Faleminderit Universitetit të Arteve të Bukura, Fondit Shqiptar të Zhvillimit dhe Helidon Halitit që organizuan në Belsh ekspozitën “RINart” e cila hedh themelet e fuqizimit të turizmit kulturor, mjaft të preferuar nga turistët vendas dhe të huaj”, shkruan kryebashkiaku Tafani, në rrjetet sociale.

POSTIMI I KRYEBASHKIAKUT TAFANI

Krenarë që u bënë bashkë në Belsh, në edicionin e tretë të ekspozitës “RINart” 🖼️🎨, studentët e Universitetit të Arteve të Bukura të Tiranës dhe ata të Universitetit të Prishtinës.

Në ekspozitën “RINart” , në Galerinë “2Botë” në 📍Seferan të Belshit, ideuar dhe kuruar nga piktori i talentuar Helidon Haliti studentët ekspozuan rreth 400 punime, duke promovuar talentet e reja të Fakultetit të Arteve të Bukura dhe duke nxitur kështu zhvillimin e turizmit kulturor në Belsh dhe në të gjithë zonën e Dumresë.

Faleminderit Universitetit të Arteve të Bukura, Fondit Shqiptar të Zhvillimit dhe Helidon Halitit që organizuan në Belsh ekspozitën “RINart” e cila hedh themelet e fuqizimit të turizmit kulturor, mjaft të preferuar nga turistët vendas dhe të huaj.

***

Përveç hapjes zyrtare, gjatë ditëve të ekspozitës do të organizohen workshope në mediumin e pikturës, akuarelit, instalacionit dhe fashion design.

Ekspozita shfaq një gamë të gjerë punimesh nga tetë programe studimore: fashion design, grafik dizajn, pikturë kavaleti, pikturë monumentale, fotografi, qeramikë, skulpturë dhe multimedia.