Nga Dash Frashëri

Një ekspozitë e bukur shqiptaro-gjermane!

Dy artiste: shqiptarja Irena Buzi dhe gjermania Gabriela Schenke ekspopojnë punimet e tyre në “Gallery 70“, te Qendra Tregtare “Toptani”, në kuadër të Tetorit Gjerman, në kujdesin e Ambasadës Gjermane në Shqipëri.

Ekspozita ka një titull të bukur: “Dialog në pikturë dhe qeramikë”.

Të dyja artistet kanë ftesat e tyre drejtuar artdashësve.

Ja mesazhi i Irena Buzit…

… dhe i Gabriela Schenke.

***

Në ceremoninë përuruese mori pjesë edhe ambasadori gjerman, Karl Bergner, këshilltari për shtypin, Martin Karl Zikcendraht dhe diplomatë të tjerë.

Edhe unë si botues i “Tirana Diplomat” jam një nga vizitorët e saj.

Ekspozita përmban punime në pikturë nga Schenke dhe qeramikë dhe pikturë nga Buzi.

Drejtuesja e Gallery 70, Laureta Basha, ndihet e lumtur me këtë ekspozitë.

“Gallery70 është krenare të mirëpresë, në kuadër të aktiviteteve kulturore të Tetorit Gjerman 2023, një ekspozitë magjepsëse që feston aftësitë krijuese të dy artisteve të shquara femra, Irena Buzi nga Tirana, Shqipëria dhe GabrielA Schenke nga Berlini, Gjermani. Të dy artistet punojnë në mediumet e pikturës dhe qeramikës, duke eksploruar sferat e natyrës, abstraksionit dhe transformimit, duke gërshetuar së bashku një rrëfim që flet për zemrën e shprehjes njerëzore”, tha Basha për Tirana Diplomat.

Basha bashkëbisedon me ambasadorin gjerman, Bergner, rreth ekspozitës . Ka një falenderim të veçantë për Ambasadën Gjermane në Shqipëri për mbështetjen ndaj këtij eventi.

“Nëpërmjet ballafaqimit të veprave të dy artisteve, Gallery70 ndjek synimin e saj për ndërtimin dhe promovimin e një dialogu midis artistëve vendas dhe ndërkombëtarë, duke u shndërruar në një qendër krijuese ndërkombëtare në Shqipëri”, thotë Basha.

Edhe Martini ka nevojë për ndonjë shpjegim artistik.

Një foto me ambasadorin gjerman merr vlera simbolike.

Në të njëjtin pozicion bëj edhe unë foton time me veprat e artit.

Vizitorët janë të shumtë, edhe pse hapësira e galerisë është modeste, por në një pozicon strategjik. Në një nga katër hyrjet e qendrës.

Punime të bukura. Peneleta të ngrohta. Lule të stilizuara.

Tetë miniaturat e Irena Buzit janë një spektakël më vete. Njera më interesante se tjetra.

Qeramikat e Buzit të shtojnë edhe më shumë dëshirën për artin e bukur.

“Bota prekëse e qeramikës shkrihet me kanavacën e pakufishme të pikturës, secili medium ushqen tjetrin, duke na lejuar të eksplorojmë kufijtë dhe kryqëzimet e krijimtarisë”, shton drejtuesja e Gallery 70.

Media është e pranishme në ceremoninë e hapjes. Një kameraman filmon gjithçka. Edhe Gazeta Online “Tirana Diplomat” është midis mediave që shkruan për këtë ekspozitë me ngjyrime ndërkombëtare.

Vizitorët fotografojnë punët që ju pëlqejnë.

Artistet Buzi dhe Schenke ndihen në “Qiellin e Shtatë”!

Një foto është kujtimi më i bukur nga kjo ekspozitë!

______________________________

Tiranë, 14 tetor 2023