Gjiganti botëror mediatik “Financial Times” e cilësoi Shqipërinë si “Italia e vogël” në një artikull të publikuar sot.

Kryeministri Edi Rama shpërndau në rrjetet sociale këtë artikull, teksa theksoi se numri i lartë i pushuesve të huaj që kanë zgjedhur për të vizituar Shqipërinë e kanë bërë atë pjesë të hartës turistike të Mesdheut.

“Turizmi i këtij sezoni në syrin e gjigantit botëror mediatik “Financial Times” që Shqipërisë i vendos epitetin e “Italisë së vogël” pas bumit të kësaj vere me pushues italianë, por edhe nga gjithë bota, si konfirmim i faktit se tanimë jemi bërë pjesë e hartës turistike të Mesdheut, përkrah shteteve të sprovuara prej shumë dekadash në këtë industri”, shkruan Rama.

Artikulli i gjigantit britanik flet dhe për vizitën e kryeministres ialiane, Giorgia Meloni në Shqipëri.

“Kryeministrja italiane Giorgia Meloni bëri një vizitë të papritur në Shqipëri këtë javë, duke iu bashkuar mijëra pushuesve verorë që kanë zgjedhur vendin ballkanik për shkak të çmimeve në rritje të Italisë dhe motit ekstrem. Meloni zgjodhi një rrugë me kosto të ulët, duke marrë një traget nga rajoni jugor italian i Pulias, ku ishte me pushime me familjen e saj për në portin shqiptar të Vlorës”, nis artikulli i “Financial Times”.

Sipas “Financial Times”, Shqipëria po gëzon një ringjallje ekonomike, pjesërisht edhe për shkak të bumit turistik.

“Një nga vendet më të varfra të Evropës, Shqipëria ka luftuar për dekada për të hequr reputacionin e korrupsionit dhe krimit të organizuar që ka shtyrë qindra-mijëra shqiptarë të emigrojnë. Por tani po gëzon një ringjallje ekonomike pjesërisht për shkak të një bumi turistik”, citohet artikulli.

Më tej, në artikull theksohet se pasagjerët e linjave ajrore drejt Shqipërisë u dyfishuan në qershor, kjo edhe për shkak të vendosjes së linjave ajrore me kosto të ulët.

”Të tërhequr nga plazhet e tij mesdhetare me çmime konkurruese, pasagjerët e linjave ajrore në Shqipëri u dyfishuan në qershor krahasuar me të njëjtën periudhë të një viti më parë, sipas ACI Europe, një shoqatë e operatorëve të aeroporteve. Hapja e linjave me kosto të ulët për në aeroportet shqiptare kontribuoi në këtë kërcim, tha ACI”, thuhet në artikull.

“Financial Times” thotë se ndërsa çmimet janë rritur në Itali, turistët ndërkombëtarë janë joshur nga kostot më të ulëta shqiptare për çdo gjë, nga akomodimi në hotel deri te restorantet dhe shezlongët. “Agjencia Federale e Statistikave të Gjermanisë zbuloi së fundmi çmimet e restoranteve dhe hoteleve në Shqipëri ishin 56 për qind më të ulëta se ato të Gjermanisë, duke e bërë atë destinacionin më të lirë të pushimeve në Evropë”, citohet artikulli.

Artikulli i “Financial Times” vijon duke e përshkruar Shqipërinë si destinacionin e momentit, me plazhet e saj me rërë, të ngjashme me Karaibet. /ATSH