Parku Kombëtar Detar Karaburun-Sazan, shtrihet në hapësirën me gjerësi 1 milje detare, përgjatë Gadishullit të Karaburunit (nga Kepi i Shën Vasilit deri te faqja e Langadhës) dhe rreth Ishullit të Sazanit. Ekosistemi ujor/detar “Karaburun-Sazan”, i shpallur “Park Kombëtar Detar” më 26.01.2022, zgjerohet nga 12.428 ha në 12.437.7 ha.
Gadishulli i Karaburunit është një rezervë natyrore, ndërsa ishulli i Sazanit është një zonë ushtarake. Në korrik 2015, ishulli i Sazanit u hap për publikun nga Agjencia Kombëtare e Bregdetit.
Parku është një mrekulli e natyrës shqiptare, ku jetojnë rreth 36 lloje të faunës dhe të florës detare me rëndësi kombëtare, rajonale e globale.
Gjithashtu mbetet një vend i rëndësishëm i specieve si: breshka e detit, foka e mesdheut, delfinë, si edhe peshkaqenë.
Foka e Mesdheut, është një specie emblematike e parkut e cila është rishfaqur së fundmi, gjë që tregon se ky park është rikthyer në habitatin e tij.
Peizazhet nënujore janë gjithashtu të një cilësie të jashtëzakonshme, me shkëmbinjtë, shpellat nënujore
Livadhet e Posidonia oceanica ofrojnë një biodiversitet relativisht të lartë të makrofaunës së fundit të detit duke përfshirë: sfungjerët, knidarët, briozoarët, molusqet, anelidët, krustacet, ekinodermët dhe ascidiet.
Zona është gjithashtu e rëndësishme për peshkimin. Fauna e peshqve përbëhet nga disa lloje që jetojnë në fund të detit dhe në grupe si: peshq të vegjël dhe të mëdhenj, krustace e molusqe.
Biodiversiteti, peizazhi dhe kultura e kësaj zone janë unikale për Mesdheun.
Bukuritë që natyra i ka falur këtij parku e kanë kthyer atë në një nga destinacionet më të bukura turistike në vend, ku çdo vit vizitohet nga mijëra turistë.
Marre nga faqja: Ne Fokus
