Muzeu Kombëtar i Artit Mesjetar nënshkroi Marrëveshje Bashkëpunimi me Universitetin e Tiranës, përkatësisht me Fakultetin e Historisë dhe Filologjisë.

Marrëveshja synon të forcojë lidhjen mes muzeut dhe botës akademike, duke krijuar më shumë hapësira për kërkim, bashkëpunim dhe përfshirjen e brezit të ri të studiuesve në jetën muzeale.

Marrëveshja u nënshkrua në kuadër të Ditës Kombëtare të Trashëgimisë Kulturore. Vëmendje iu kushtua edhe afrimit të të rinjve me botën e ikonografisë, si edhe njohjen e promovimin e trashëgimisë sonë kulturore.

Një prej momenteve të veçanta ishte biseda me studiuesin dr. Ahilino Palushi dhe nxënësit e shkollës “Tefta Tashko Koço”, ku u diskutua mbi artin e ikonografisë dhe një prej përfaqësuesve të rëndësishëm të kësaj tradite, Nilu Jeromonakun. Për nxënësit, kjo nuk ishte thjesht një orë mësimi, por edhe një mundësi për ta parë trashëgiminë përtej objekteve të ekspozuara, si një histori që duhet njohur, kuptuar dhe përcjellë.

Të rinjtë patën mundësinë edhe ta shihnin nga afër se si lind një ikonë. Së bashku me specialistin e ikonografisë Kostika Koti, nxënësit e klasës IX të shkollës “Sevasti Qiriazi” u përfshinë në procesin praktik të pikturimit të një ikone, në ambientet e Muzeut Kombëtar të Artit Mesjetar.

Furçat, ngjyrat dhe teknikat e ikonografisë u kthyen në një përvojë konkrete për të rinjtë, duke ngjallur kureshtje dhe interes për një nga format më të rëndësishme të artit dhe trashëgimisë shqiptare.

Burimi ATSH