Nga Prof. Dr. Hajri Shehu

Albumi “Arti i Ikonografisë në Shqipëri” i autorëve Andrea Llukani dhe Ylli Drishti është një botim serioz, që ka pasuruar bibliotekën e historisë së artit mesjetar në Shqipëri.

Ai përmban një koleksion unikal veprash ikonografike të shekujve XIV-XX, që ndodhen të ekspozuara në muzetë kryesorë kombëtarë të Shqipërisë, në Tiranë, Berat dhe Korçë.

Teksti i albumit është prezantues, analizues e vlerësues dhe evidenton ikonografët më të rëndësishëm, që kanë zhvilluar veprimtarinë e tyre në Shqipëri nga shek. XIV-XX.

Albumi shoqërohet me fotografi cilësore me ngjyra të veprave (ikonave) të çdo artisti ikonograf në formë kronologjike, si edhe me imazhet e ikonostaseve, kishave dhe objekteve të ndryshëm liturgjikë, që ndodhen në muzetë kryesorë kombëtarë të Shqipërisë, si Muzeu Historik Kombëtar, Tiranë; Galeria Kombëtare e Arteve, Tiranë; Muzeu Kombëtar “Onufri”, Berat dhe në Muzeun Kombëtar të Artit Mesjetar, Korçë.

Dy autorët e këtij botimi janë specialistë të njohur në studimet mbi artin mesjetar shqiptar.

Andrea Llukani

Ylli Drishti

Nëpërmjet botimit të albumit “Arti i ikonografisë në Shqipëri” u bë e mundur krijimi i një panorame të plotë të veprës së ikonografëve, që kanë ushtruar aktivitetin e tyre në Shqipëri si: Onufri, i biri i tij Nikolla, Onufër Qiprioti, David Selenica, Kostandin Shpataraku, Zografët, Çetirët, Mihal Anagnosti etj.