Nga Prof. Hajrush Fazliu

Në ambientet e Galerisë së Arteve në Pejë, u hap me sukses Ekspozita Personale “Stinët Shqiptare” e piktorit të njohur nga Elbasani, z. Sadik Kasa, një krijues i përkushtuar që përmes penelit të tij sjell bukuritë natyrore, historike dhe shpirtërore të trojeve shqiptare.

Në fjalën përshëndetëse, znj. Xheneta Suka, Drejtoreshë e DKRS-së së Komunës së Pejës, vlerësoi lart veprimtarinë artistike dhe kontributin krijues të piktorit Sadik Kasa, duke theksuar rëndësinë e bashkëpunimit kulturor dhe promovimit të vlerave artistike mbarëshqiptare.

Për vlerat estetike dhe mesazhet artistike të ekspozitës folën edhe kolegët dhe miqtë e autorit, Prof. Hajrush Fazliu dhe piktori i mirënjohur Zymer Mulliqi, të cilët vlerësuan pjekurinë krijuese, ndjeshmërinë koloristike dhe mënyrën autentike me të cilën autori paraqet peizazhet, qytetet historike dhe atmosferën e stinëve shqiptare.

Në shenjë mirënjohjeje, autori Sadik Kasa falënderoi institucionet, kolegët, miqtë dhe publikun e pranishëm për mbështetjen dhe interesimin e treguar ndaj krijimtarisë së tij.

Ekspozitën e shpalli të hapur Drejtori i Galerisë së Arteve në Pejë, z. Turhan Bajraktari, duke uruar që kjo ngjarje artistike të jetë një urë e re komunikimi kulturor mes artistëve dhe publikut.

Ekspozita “Stinët Shqiptare” do të qëndrojë e hapur për 15 ditë, duke u ofruar artdashësve mundësinë të shijojnë një koleksion veprash që pasqyrojnë me ndjeshmëri dhe mjeshtëri bukuritë e peizazhit, historisë dhe identitetit shqiptar.
Suksese 🙏🙏🙏