Nga Julia Vrapi

Njerëzit dhe puna e përditshme janë në qendër të projektit artistik “Workers”, që sjell në Tiranë punën e artistit polak Jakub Elwertowski. Përmes pikturës, kolazhit dhe përdorimit të materialeve të zakonshme e të gjetura, artisti vëzhgon realitetin e përditshëm dhe mënyrën se si ai përkthehet në art. Ekspozita e kuruar nga Prof. Asoc. Albes Fusha do të hapet këtë mbrëmje në Galerinë FAB pranë Universitetit të Arteve në Tiranë.

Artisti polak Jakub Elwertowski kujton rikthimin e tij në Shqipëri, ku në vitin 2013, së bashku me artistë shqiptarë, përgatiti ekspozitën e parë të pikturës polake në Shqipëri. “Së bashku me Ermir Hoxhën, Albes Fushën, Sadik Spahijën dhe Fatmir Mizirin përgatitëm ekspozitën e parë të pikturës polake në Shqipëri, pikërisht këtu. Për më tepër, ende mbaj rreth qafës një shqiponjë që e mora atëherë.

Nuk më pëlqen shumë të flas në hapje ekspozitash, ndaj do ta mbaj fjalën time të shkurtër dhe të përmbledhur. Nuk e konsideroj veten artist dhe, në fakt, nuk më pëlqen veçanërisht as ky term. E shoh veten më shumë si një zejtar krijues, i cili, në njëfarë kuptimi, prodhon kompozime në vend që t’i pikturojë ato.

Ashtu si njerëzit që paraqes kryejnë punën e tyre çdo ditë, edhe unë kryej timen- një punë fizike, të përsëritur dhe të mbështetur mbi një punë të disiplinuar dhe të vazhdueshme”, shprehet ai. Seria e pikturave “Workers” u krijua në vitin 2015 dhe vazhdon të jetë një projekt në zhvillim. Në këtë ekspozitë që është e para për sezonin e vjeshtës në FAB dhe hapet këtë shtator do të paraqitet afërsisht gjysma e veprave të krijuara deri më sot.

Ekspozita në Tiranë

Ekspozita “Workers” që sjell punët e artistit Jakub Elwertowski bëhet këtë shtator dhe pjesë e jetës artistike në Tiranë. Artisti shprehet se seria e pikturave vazhdon të zhvillohet dhe të zgjerohet me vepra të reja, megjithëse jo në mënyrë të vazhdueshme. “I rikthehem asaj herë pas here- thjesht kam nevojë të largohem prej saj për njëfarë kohe, në mënyrë që të mund t’i rikthehem me një vështrim të freskët.

Të gjitha veprat janë realizuar duke përdorur teknikën e kolazhit, e cila prej shumë vitesh është njëkohësisht firma ime dhe mediumi im i preferuar artistik. Tërheqja im me kolazhin pasqyrohet edhe në faktin se edhe disertacioni im i doktoraturës u bazua në këtë teknikë. Seria “Workers” ka të bëjë, mbi të gjitha, me njerëzit dhe jetën e tyre të përditshme. Është bota që më rrethon këtu dhe tani”, vijon artisti polak.

Protagonistët e serisë janë individë, puna e të cilëve sipas tij, përbën themelin e shoqërisë bashkëkohore, por që shpesh mbeten të pavërejtur. “Kjo nuk është një punë e udhëhequr nga shprehja emocionale. Këtu nuk do të gjeni metafora, simbolikë apo kuptime të fshehura.

Është një dokument- një formë reportazhi, dhe asgjë më shumë”, shprehet artisti polak Jakub Elwertowski. Ekspozita do të hapet këtë mbrëmje në galerinë FAB dhe do të qëndrojë deri në datën 10 shtator për publikun. Pas “Workers”, galeria FAB do të vijojë programin e saj me ekspozita të tjera gjatë sezonit të vjeshtës.