Ekspozita “Gjurmë drite” e Kudret Durollarit në Galerinë “Nikolet Vasia” në Durrës sjell rreth 60 tablo me peizazhe të Pogradecit, liqenin dhe natyrën. Punimet ndërthurin realizmin me impresionizmin, duke përcjellë përmes dritës dhe ngjyrave një atmosferë të ngrohtë e poetike.

“Pogradeci dha atë spunton e peizazhit, të bukurisë, të ngjyrës, të qetësisë, të romantizmit. Një artist duhet të eksplorojë edhe të eksperimentojë gjithmonë duke qenë gjithmonë në kërkim”, u shpreh piktori Kudret Durollari.

Pogradeci është frymëzimi kryesor i Kudret Durollarit, i cili ka ekspozuar edhe në Galerinë Kombëtare të Arteve dhe jashtë vendit. Sipas piktorit Caush Vathi, krijimtaria e tij dallohet për vlerat artistike dhe interpretimin autentik të natyrës.

“Kudreti është shumë natyral, është shumë i këndshëm, ka ngjyrë, vizaton bukur, ka tematikë, ka është i larmishëm edhe në krijimtarinë e vet”, u shpreh piktori Caush Vathi.

Ekspozita ka tërhequr vëmendjen e artistëve dhe artdashësve të Durrësit. Peizazhet e Durollarit përcjellin dritë e qetësi, ndërsa Fatmir Toçi e vlerësoi krijimtarinë e tij duke e lidhur me traditën e peizazhit shqiptar të Vangjush Mios.

“Një nga piktorët më aktivë me një karrierë jashtëzakonisht të gjatë edhe me një numër të jashtëzakonshëm punimet, i cili ka eksploruar cep më cep vendin tonë po edhe vende të tjera jashtë ku kemi shkuar”, tha Fatmir Toçi, Botues dhe koleksionist arti.

Për Kudret Durollarin, peizazhi, ngjyrat dhe qetësia janë pjesë e pandarë e botës së tij artistike. Ekspozita “Gjurmë drite” mbyll programin e gushtit në Galerinë “Nikolet Vasia”, ndërsa aktivitetet artistike do të vijojnë më 4 shtator me një ekspozitë të re.
I diplomuar në Liceun Artistik “Jordan Misja” në Tiranë, Durollari e nisi rrugëtimin e tij krijues përmes portreteve, peizazheve dhe natyrave të qeta. Në veprat e tij, drita diellore, perspektiva dhe ngjyra krijojnë një harmoni të veçantë, ndërsa Pogradeci, liqeni, vjeshta dhe dimri shfaqen si një poezi vizuale.

Studimet e mëvonshme në skenografi dhe kostumografi në Universitetin e Arteve, Tiranë, i dhanë krijimtarisë së tij dimensione të reja shprehëse.

Me një kontribut të vazhdueshëm në jetën kulturore të qytetit të tij dhe më gjerë, Kudret Durollari ka ekspozuar në Pogradec, Galerinë Kombëtare në Tiranë, Paris, Prishtinë, Çikago dhe Mali i Zi. Veprat e tij gjenden në koleksione private në Shqipëri, Evropë dhe më tej.

Krijimtaria e Durollarit mbetet një dëshmi e dashurisë së pambarimtë për vendlindjen, natyrën dhe njeriun.