Me rastin e 60-vjetorit të Universitetit të Arteve, më datë 13 maj 2026 u zhvillua një konferencë jubilare që mblodhi së bashku breza artistësh, pedagogësh, studentësh dhe miqsh të universitetit.

Në konferencë morën pjesë figura të rëndësishme të jetës publike, mes të cilëve Ministri i Kulturës, Turizmit dhe Sportit, z. Blendi Gonxhja, Kryetari i Akademisë së Shkencave, Akademik Skënder Gjinushi, rektorë të universiteteve të tjera, si dhe drejtues e përfaqësues të ambasadave, institucioneve homologe dhe partnere.

Ceremonia u hap me performancën e korit të studentëve të Fakultetit të Muzikës, nën drejtimin e mjeshtrit Bujar Alliu, të cilët interpretuan për herë të parë në historinë 60-vjeçare të institucionit himnin zyrtar të tij, kompozuar nga Prof. Endri Sina, me tekst të pedagoges Eriona Rushiti.

Fjalën hapëse të konferencës e mbajti Rektori i Universitetit të Arteve, Prof. Dr. Erald Bakalli.

Përshëndetën me fjalën e tyre edhe Ministri i Kulturës, Turizmit dhe Sportit, z. Blendi Gonxhja, ish-student i Universitetit të Arteve si dhe ish-Rektori, Prof. Petrit Malaj.

Pjesë e ceremonisë u bënë edhe ish-rektorët e universitetit, Prof. Dr. Fatmir Hysi dhe Prof. Kastriot Çaushi, të cilët, krahas Prof. Malajt u nderuan nga Rektori për kontributin në drejtimin dhe zhvillimin e institucionit.

Gjatë ceremonisë u shpërndanë certifikata mirënjohjeje për ish-pedagogë të shquar, në vlerësim të kontributit të tyre si pjesë e rëndësishme e historisë dhe identitetit të këtij institucioni.

Një moment i veçantë iu kushtua kujtimeve dhe dëshmive personale nga breza të ndryshëm studentësh, duke krijuar një urë simbolike mes fillesave të institucionit, me ish-studentin e Institutit të Lartë të Arteve, Mjeshtër i Madh z. Ermir Dizdari dhe të ardhmes së institucionit, me studentin Enea Trimi, njëherazi Kryetar i Këshillit Studentor të Universitetit të Arteve.

Në vijim, aktiviteti u zhvendos nga Salla e Madhe e Koncerteve në ekspozitën fotografike kushtuar ish-drejtuesve të institucionit, ku u zhvilluan biseda mes miqsh dhe kolegësh.

Kjo ceremoni përbën një moment të rëndësishëm në historinë e Universitetit të Arteve dhe do të mbetet një kujtim i vyer për të gjithë ata që kanë qenë dhe vijojnë të jenë pjesë e tij. Njëkohësisht, ceremonia shërbeu si një dëshmi se Universiteti i Arteve, si institucioni i vetëm publik i arsimit të lartë me status të veçantë në fushën e arteve, do të vijojë misionin e tij për formimin e brezave të rinj të artistëve, si dhe për zhvillimin e artit, kulturës dhe kërkimit artistik e shkencor në vend.