Nga Fatmir Toçi

NJË EKSPOZITË NDRYSHE NGA DRITAN NASI

Në Ekspozitën e piktorit Dritan Nasi titulluar“Avatar City”, në Galerinë FAB të Universitetit të Arteve.

Një ekspozitë ndryshe e piktorit Dritan Nasit, pedagog në Universitetin e Arteve në Tiranë, ku janë trajtuar më mjeshtëri e ndjesi artistike fenomenet shoqërore bashkëkohore, si vaniteti, pasiviteti, varësia nga rrjetet sociale dhe “skllavëria” prej tyre.

Shqetësimi i autorit-intelektual për shoqërinë e sotme të zhveshur nga emocionet e vërteta është indicja e tij për realizimin e kësaj ekspozite, që, siç edhe shprehet ai “kërkon të pasqyrojë një botë, ku njerëzit nuk jetojnë për të përjetuar realisht jetën e tyre, por për të treguar se po jetojnë”.

Dritan Nasi është frekuentues i rregullt i Kolonive të Piktorëve që organizon ILP (Instituti i Librit dhe i Promocionit) në Shqipëri dhe vendet e tjera të Rajonit dhe Evropiane, por në kontaktet me natyrën dhe objektet e tjera në terren jemi mësuar të shohim prej tij punime me një stiistikë ndryshe, me frymëzim të drejtëpërdrejtë nga mjedisi dhe me emocionet që të jep natyra.

Ekspozita “Avatar City” është e ndërtuar mbi një ide të mirëmenduar dhe e shprehur me ngjyra të gjalla që i japin jetë kompozimeve ekspresive plot ide të autorit.

Urime autorit për risitë ideore e artistike që sjell në këtë ekspozitë, e cila mund të prezantohej me sukses në çdo galeri apo vend tjetër ekpozimi, si brenda edhe jashtë vendit.