Një restorant unik me emrin e kryeministres simpatike italiane, Giorgia Meloni!

Është ky investimi më i fundit në fushën e kulinarisë nga investitori i mirënjohur, Gjergj Luca.

“Rozafa Fish City” hapi në Shëngjin “Trattoria Meloni”, një ndërthurrje midis kulinarisë elitare, artit të bukur dhe politikanes më të fortë sot në Europë.

Luca e konsideron hapjen e restorantit të ri, si “shtëpia e mirënjohjes për konsolidimin e miqësisë italo-shqiptare”.

“Kur kulinaria, arti, politika dhe mirënjohja bëhen bashkë prodhojnë gjëra të bukura. Ndaj Rozafa vendosi të hapë jo vetëm restorantin më të ri por edhe shtëpinë e mirënjohjes për konsolidimin e miqësisë italo-shqiptare dhe simbol të saj zgjodhëm një grua të fortë. Mirësevini në tratorinë e ngjyrave, të shijes dhe të epokës së Melonit”, shkruan Luca në postimin e tij në rrjetet sociale.

Portretet e Giorgia Melonit janë realizuar nga peneli i “Mjeshtrit të Madh”, Helidon Haliti, të cilat paraqesin me mjeshtëri gjendje të ndryshme emocionale dhe “pa maskë” të gruas më të famshme të Italisë.